Delhi Crime : लेकाच्या नव्या आयुष्याची सुरूवात होत असतानाच कोणता बाप आपल्या पोटच्या गोळ्याचा खून करू शकतो? पण अशी एक घटना दिल्लीत (Delhi) घडलीय. 7 मार्चच्या रात्री देशाची राजधानी दिल्ली हादरली, या दिवशी असे काही हत्याकांड घडले, ज्याने लोकांना हादरवून सोडले. आपल्या तरुण मुलाच्या लग्नाच्या काही तास आधी चक्क वडिलांनी चाकूने धारदार हल्ला करून मुलाचा खून केला. त्यानंतर 50 लाखांचे दागिने आणि रोकड घेऊन पळून गेला. पोलिसांनी त्याला अटक करून चौकशी केली असता, त्याने जे काही केले ते योग्यच असल्याचे सांगितले. त्याला कसलाही पश्चाताप नाही. असं तो पोलिसांनी घेतलेल्या जबाबात म्हणाला.
50 लाखांचे दागिने, रोकड घेऊन पळून गेला
54 वर्षीय पित्याने लग्नाच्या काही तास आधी आपल्या 29 वर्षीय मुलाची निर्घृण हत्या केली. यानंतर आरोपी बाप दागिने आणि मौल्यवान वस्तू घेऊन घटनास्थळावरून पळून गेला. या खळबळजनक खून प्रकरणाच्या तपासादरम्यान अनेक गोष्टी पोलिसांसमोर आल्या आहेत. आपल्यापासून वेगळं राहणाऱ्या पत्नीला धडा शिकवण्यासाठी आरोपी पित्याने आपल्या जिम ट्रेनर मुलाची हत्या केल्याचं पोलिसांचे म्हणणे आहे. 6-7 फेब्रुवारीच्या रात्री 29 वर्षीय मुलगा गौरव सिंघल याची त्याचे वडील 54 वर्षीय रंगलाल सिंघल यांनी वार करून हत्या केली होती. गौरव सिंघल हा जिम ट्रेनर होता. त्याचे लग्न होणार होते. लग्नाच्या काही तासांपूर्वी तिच्या दक्षिण दिल्लीतील घरी त्याच्या चेहऱ्यावर आणि छातीवर चाकूने 15 वार करण्यात आले. हत्येवेळी रंगलालसोबत अन्य तीन जणांचाही सहभाग होता. गुन्हा केल्यानंतर आरोपी दिल्लीहून जयपूरला पळून गेला होता.
"हे सारं काही पत्नीला धडा शिकवण्यासाठीच"
दक्षिण दिल्लीचे पोलीस अधिकारी अंकित चौहान म्हणाले की, आम्ही CCTV फुटेज आणि घटनेच्या इतर तपशीलांचे विश्लेषण केले, ज्यावरून असे दिसून आले की आरोपी रंगलाल घटना केल्यानंतर घटनास्थळावरून पळून गेला होता आणि त्याने आपला फोन बंद केला होता. त्याला जयपूर येथून अटक करण्यात आली. अटकेच्या वेळी रंगलालकडे 50 लाखांचे दागिने आणि 15 लाखांची रोकड होती, ज्या घेऊन तो घरातून पळून गेला होता. चौकशीत आरोपीने पोलिसांना सांगितले की, त्याचे पत्नी आणि मुलासोबतचे संबंध चांगले नव्हते. पत्नीला धडा शिकवण्यासाठीच त्याने आपल्या मुलाची हत्या केली आहे. आरोपीची पत्नी त्याच्यापासून वेगळी राहत आहे. आरोपीने तीन-चार महिन्यांपासून हत्येचा कट रचला होता, असे तपासात समोर आले आहे.
अत्यंत हुशारीने हत्येचा कट रचला!
पोलिसांनी दिलेल्या माहितीनुसार, आरोपी रंगलाल आणि त्यांचा मुलगा गौरव सिंघल यांच्यात बुधवारी रात्री जोरदार वाद झाला. यावेळी गौरवने त्याचे वडील रंगलाल यांना कानाखाली मारली होती, त्यामुळे रंगलालला खूप राग आला आणि त्यानंतर त्याने गौरवची हत्या केली. आरोपींनी अत्यंत हुशारीने हत्येचा कट रचला असल्याचे पोलिसांनी सांगितले. आरोपी रंगलाल याने तीन जणांना कामावर घेऊन त्यांना 75 हजार रुपये दिले होते. खुनाच्या वेळी ते रंगलालसोबत होते.
आरोपी बाप पोलिसांसमोर म्हणाला - केलेल्या कृत्याचा पश्चाताप नाही
पोलिसांनी सांगितले की, चौकशीदरम्यान रंगलालला त्याच्या कृत्याबद्दल कोणताही पश्चाताप झाला नाही. त्याने जे काही केले ते योग्यच असल्याचेही सांगितले. आरोपीने पोलिसांना सांगितले की, मुलगा ऐकत नाही, तो मनमानी करत असे आणि यामुळे तो नाराज होता. त्याच्या आईनेही गौरवला नेहमीच साथ दिली. चौकशीदरम्यान, आरोपी रंगलाल गेल्या तीन-चार महिन्यांपासून आपल्या मुलाची हत्या करण्याचा कट रचत होता, अशी माहितीही पोलिसांना मिळाली.
हेही वाचा>>>